يادمعة الشوق

يادمعة الشوق وابكي غاليٍ مدّي
ماعدت اشوفه ولا نقرا لمكتوبه


هلّي وهلّي على اللي مالكٍ ودّي
خلٍ حياتي عقب فرقاه منكوبه


وجسْرٍ مضى بيننا ماعاد به شدّي
ايلا انتخيته قصر مايلحق اغروبه


واعْنانه اللي من اوّل في حكم يدّي
افلْ وخلا دموع العين مسكوبه


واليوم عقبه همومي مالها حدّي
نار الوله في صميم القلب مشبوبه


والوجد لصْخيّف الذّرعان متْعدّي
ودونه فلول السّعد شدّت لمركوبه


يالله سألتك تعدّل حظٍ مصدّي
نحْسٍ وايلا جيت اباسْال نفّض جيوبه


وعزّاه من غيبتك يانايف القدّي
يامن وشمني غلا بانت بي ضْروبه


ارحم عليلٍ بحكم الطّب متردّي
واظن الاموات من فرقاك هلّو به

--------------------------------------------------------------------------------